Muzikaal Prinsebal vur Prins Roy I

Roy de Kleijn (38) is zaoterdág 13 jannewarie benuumd tot Prins van Aostrum, Lull en d’n Boshuuze. Mit zien Adjudanten Mark Broeren (38) en Roy Willems (39) en Nar Bob van Mil (37) an zien zie, draagt Prins Roy dit vastelaovesseizoen d’n ánvoerdersbând.

Ien enne muzikale en bomvolle Oesterham wiēr d’r zoeëas âltied urst afscheid genome van Prins Kees I en zien Kwartet. Kees wiēr middels ut Groeëte Ape Festijn opgenome as âld Prins ien de club van de Àld Aostrumse Prinse (AAP). Vur dit muziekspektakel haaj de AAP diverse bekende artieste uutgenuuëdegd vur én optreeje. Zoeë gave Oeëre Toe!, Bjorn en Mieke, De Toppers, Queen en AC/DC acte de présence. Um enkele optreejes te doēn slage was enne helpende hând van Kees nuuëdeg. De zaal zaag dat Kees zien uuterste baest deuj um dit Groeëte Ape Festijn tot én sukses te make, en hoe kòs ut ok ânders dan dat Kees as laeste artiest op de rol stoond. Heej bròcht ut Apelied ten gehuure, wat dur sommige as de baeste act van d’n aovend wiēr ontvange, en kos uuteindelek toegevoegd werre as neej lid van de AAP.

Vurdat d’r gestart kos werre mit de bekendmaking van de neeje Prins, kwaam Muziekverieëniging SMT mit én kado vur alle bezuukers van dizze aovond. Dit ter gelegenheid van hun 100-jaoreg jubileum. As antwoord hierop haaj de Carnavalsverieëneging ok én kado vur SMT. D’n Oesterham was umgetoverd tot enne klassieke Royal Oester Hall. Hier kwaame vief sjiek gekleejde kéls de Muziekverieëniging roasten. Vanzelfspraekend was de roast nie metieën én cadeau, már de dóropvolgende make-over van ut styliste duo J&T gaaf SMT neeje ienzichte aover de meugelekheede ien de toekomst. De laeste roast ging ovver ut uuterlek vertoeën van SMT. Ter gelegenheid hiervan han J&T en neej kostuum ontworpe. Dit leek as twieë druppels water op ut Prinsepak van âld Prins Kees, wordur ut efkes d’r op leek dat de neeje Prins dur Muziekverieëniging SMT geprissentieërd zeuj werre. Uut ut dur SMT angebooje cadeau sprong d’n kersverse Prins Roy I te vurschien. Prins Roy wiēr mit alle toebehuure geienstallieërd as neeje Prins, opende ut vervolg van d’n aovend mit enne mojje openingsspeech en dook vervolges de zaal ien. Mit én knallend optreeje van Sjloetingstied was ut nog lang gezellig ien d’n Oesterham